يعني ايه withanolides ؟
لو بتدور على أشواجندا وبتقارن بين المنتجات… أكيد شُفت كلمة غريبة شوية مكتوبة على العبوة، وهي: Withanolides
وساعتها بتسأل نفسك:
هو ده اسم مادة؟
ولا نوع أشواجندا؟
ولا رقم تسويق والسلام؟
دلوقتي هنعرف يعني إيه Withanolides بالظبط، وإزاي الرقم ده هو اللي بيفرق بين منتج “ممكن يشتغل معاك” ومنتج “شكله ممتاز بس فاضي”
يعني إيه Withanolides في الأشواجندا؟
Withanolides (ويثانولايدز) دي المركّبات النشطة الأساسية الموجودة في نبات الأشواجندا، ودي اللي مسؤولة عن أغلب التأثيرات اللي الناس بتاخد الأشواجندا عشانها..
ببساطة: هي المادة الفعالة الأساسية في الأشواجندا. زي ما في أي دواء بيكون فيه “Active Ingredient”… الأشواجندا “الـ Active Ingredient بتاعها” هو الـ Withanolides.
Withanolides بتعمل إيه؟ (ليه الناس بتاخد أشواجندا أصلاً؟)
الـ Withanolides مرتبطة بتأثيرات الأشواجندا زي:
تقليل التوتر والضغط العصبي (Adaptogen)
دعم الهدوء والاسترخاء
تحسين جودة النوم عند ناس كتير
دعم التركيز والمزاج
دعم الأداء البدني والتعافي بشكل عام
طبعًا الاستجابة بتفرق من شخص للتاني، ومش كل الناس بتحس بنفس القوة.
طيب… هل كل منتجات الأشواجندا فيها Withanolides؟
أيوة… أي أشواجندا طبيعية فيها Withanolides.
بس الفرق الكبير بيبقى هنا:
كام “نسبة” الـ Withanolides؟
لأن المنتج ممكن يكون:
بودر جذور (تركيز ضعيف نسبيًا)
أو Extract مستخلص مركز (تركيز أعلى)
وهنا بتظهر قوة المنتج والفروقات الحقيقية.
أهم سؤال: أحسب الـ Withanolides إزاي؟
دي أهم نقطة في المقال كله، والمعادلة بسيطة:
Withanolides (mg) = جرعة الأشواجندا (mg) × نسبة الـ Withanolides
مثال:
لو المنتج مكتوب عليه:
Ashwagandha Extract 600mg – 5% Withanolides
يبقى:
600 × 0.05 = 30mg Withanolides
يعني المنتج ده فعليًا بيديك 30mg مادة فعالة.
مثال مهم:
منتجين الاتنين مكتوب عليهم 600mg:
المنتج (A)
600mg
5% Withanolides
= 30mg فعلي
المنتج (B)
600mg
من غير تحديد نسبة
= هنا انت مش عارف أخدت كام فعلي… ممكن يبقى 5mg وممكن 25mg وممكن أقل.
عشان كده تحديد النسبة = شفافية + ثقة + قوة
طيب اختار المنتج ازاي؟
قبل ما تشتري أي أشواجندا… اسأل نفسك:
مكتوب نسبة الـ Withanolides؟
تعرف تحسبها بالمليجرام؟
الجرعة اليومية واضحة؟
عدد الكبسولات يخليك تكمل شهر على الأقل؟
فيه تقييمات حقيقية وتجربة مستخدمين؟
ولو المنتج:
مش كاتب نسبة
مش كاتب نوع الاستخلاص
يبقى أنت غالبًا داخل على “منتج شكل وبس”.
